ھێزە ئەمنییەکانی سەڵاحەدین تۆمەتبارێکیان دەستگیرکرد کە چەند ڕۆژێک پێش ئێستا ژەھری مشکی خستبووە ناو تانکی ئاوی خواردنەوەی چێشتخانەیەکی قەزای شەرگات لە پارێزگای سەڵاحەدین و بووە ھۆی ژەھراوی بوونی 300 کەس.
ئەمڕۆ پێنجشەممە 20ی ئابی 2026 یاسین موحەممەد، ئەندامی ئەنجومەنی پارێزگای سەڵاحەدین و سەرۆکی لیژنەی تەندروستی ڕایگەیاند: “دوای بەدواداچوونی ورد و لێکۆڵینەوەی سەرەتایی لەسەر ڕووداوی ژەھراوی بوونی نزیکەی 300 هاووڵاتی، ئاسایشی نیشتیمانی ناوچەکە توانیان لە ماوەیەکی کەمدا تۆمەتبارەکە دیاری بکەن و دەستگیری بکەن.”
یاسین موحەممەد گوتیشی: تۆمەتبارەکە لە کاتی لێکۆڵینەوە سەرەتاییەکاندا بە فەرمی دانی بە تاوانەکەیدا ناوە و لە هۆکاری ئەنجامدانی کارەکەشی گوتویەتی؛ “دوای ئەوەی چێشتخانەکە ناوبانگی زۆری دەرکرد و ئیش و کاری باشیان بوو، منیش لەسەر بنەمای ئیرەیی و تۆڵە سەندنەوە ئەو کارەم ئەنجام داوە.”
ئەو ئەندامەی ئەنجومەنی پارێزگای سەلاحەدین و سەرۆکی لیژنەی تەندروستی دەشڵێت: ” لە ئێستادا بەشێکی زۆری ئەو کەسانەی ژەهراوی بوون، دوای وەرگرتنی چارەسەر نەخۆشخانەیان جێهێشتووە و گەڕاونەتەوە ماڵەکانیان، تەنیا 48 کەسیان ماون و لەژێر چاودێری پزیشکیدان.”
ئاماژەی بەوەشکرد، ڕێکاری توندی یاسایی بەرانبەر تۆمەتبار دەگیرێتەبەر و دوای تەواوبونی ڕێکارەکان دەدرێتە دادگا بۆ سزادانی لەسەر ئەو کارەی کە ژیانی سەدان هاووڵاتی خستە مەترسییەوە.
