منداڵێکی تەمەن 1 ساڵ و 10 مانگ بە ناوی «یاس بێلال» لە شەوی 17ی تشرینی یەکەمی 2026 لە چێشتخانەیەک لە هەولێر گیانی لەدەستدا. لە کاتێکدا باوکی منداڵەکە دەڵێت هۆکاری مردنەکە تەزووی کارەبا بووە، پارێزەری خاوەنی چێشتخانەکە ئەوە ڕەت دەکاتەوە و دەڵێت منداڵەکە لە نافوورەکەدا خنکاوەتەوە.
بەپێی زانیارییە بڵاوکراوەکان، منداڵەکە لە ناوچەی یاریی منداڵان لە چێشتخانەکە بووە و کەوتووەتە ناو نافوورەیەکی ئاو. دوای ڕووداوەکە، چێشتخانەکە داخراوە و دەزگا پەیوەندیدارەکان چاوەڕێی ڕاپۆرتی فەرمیی پزیشکی داد دەکەن بۆ دیاریکردنی هۆکاری ڕاستەقینەی گیانلەدەستدانەکە.
بۆچوونی خێزانی منداڵەکە
بیلال فوئاد، باوکی یاس، کە سکاڵایەکی یاسایی لەسەر خاوەنی چێشتخانەکە تۆمار کردووە، گوتوویەتی: «هیچ شتێک ناخوازم، تەنیا با یاسا کاری خۆی بکات.»
باوکی منداڵەکە جەختی لەوە کردووەتەوە کە کوڕەکەی بەهۆی تەزووی کارەباوە گیانی لەدەستداوە، نەک بەهۆی خنکان لە ناو ئاوەکەدا. بە گوتەی ئەو، لە پزیشکی داد پێیان گوتووە لە 4 شوێنی جەستەی منداڵەکەدا شوێنەواری کارەبا هەیە.
بیلال هەروەها خاوەنی چێشتخانەکە بە کەمتەرخەمی تۆمەتبار دەکات و دەڵێت لە دەوروبەری نافوورەکە هیچ تابلۆیەکی ئاگادارکردنەوە، پەرژین یان چاودێرێک نەبووە. بە گوتەی ئەو، دوای نزیکەی 7 خولەک گەڕان، خوشکە 8 ساڵەکەی یاس تەرمەکەی لە ناو نافوورەکەدا دۆزیوەتەوە.
باوکی یاس هەروەها بە ناڕەزایییەوە ڕایگەیاندووە کە دوای ئەوەی منداڵەکەیان بە مردوویی لە ناو نافوورەکەدا دۆزیوەتەوە، کارمەندانی چێشتخانەکە لە خێزانەکەیان داوا کردووە پارەی ئەو خواردنە بدەن کە داوایان کردووە و پاشان شوێنەکە بەجێبهێڵن.
بۆچوونی خاوەنی چێشتخانە
هاوسەر خۆشناو، پارێزەری خاوەنی چێشتخانەکە، بە پشتبەستن بە تۆماری کامێرا چاودێرییەکان، ڕوونکردنەوەیەکی جیاوازی پێشکەش کردووە.
بە گوتەی ئەو، کارمەندانی چێشتخانەکە 2 جار منداڵەکەیان گەڕاندووەتەوە بۆ لای خێزانەکەی، بەڵام یاس بۆ جاری 3یەم گەڕاوەتەوە بۆ لای نافوورەکە. پارێزەرەکە دەڵێت منداڵەکە دوای نزیکەی 4 خولەک یاریکردن، کەوتووەتە ناو ئاوەکە و پەلەقاژەی کردووە.
پارێزەرەکە هەروەها پرسیاری ئەوەی کردووە کە ئەگەر هۆکاری مردنەکە تەزووی کارەبا بووبێت، کەسی ئەوەی منداڵەکەی لە ناو ئاوەکە دەریهێناوە بۆچی تووشی تەزووی کارەبا نەبووە.
ڕوونکردنەوەی دەزگا فەرمییەکان
کیفاح حەسەن، گوتەبێژی پۆلیسی هەولێر، ڕایگەیاندووە لێکۆڵینەوەی سەرەتایی دەستی پێکردووە، بەڵام هۆکاری سەرەکیی گیانلەدەستدانەکە، ئەگەر خنکان یان تەزووی کارەبا بێت، دوای دەرچوونی ڕاپۆرتی فەرمیی پزیشکی داد دیاری دەکرێت.
نەبەز عەبدولحەمید، قایمقامی هەولێر، ڕایگەیاندووە چێشتخانەکە داخراوە و ڕێکارە یاساییەکان بەرامبەر خاوەنەکەی دەگیرێنەبەر.
بەرگریی شارستانی و بەڕێوەبەرایەتیی گەشتوگوزاری هەولێر دەڵێن مۆڵەت بە شوێنە گەشتیارییەکان بەپێی ڕێکارە فەرمییەکان دەدرێت و ئامادەن هاوکاریی لێکۆڵینەوەکان بکەن. بەڵام بۆ باسکردنی وردەکاریی مۆڵەتی ئەم چێشتخانەیە، پێویستیان بە نووسراوی فەرمیی دادگە هەیە.
دۆسیەکە هێشتا لە قۆناغی لێکۆڵینەوەی دادوەرییە و چاوەڕێ دەکرێت ڕاپۆرتی پزیشکی داد هۆکاری مردنەکە و بەرپرسیارییە یاساییەکان لە ڕووداوەکەدا یەکلا بکاتەوە.
