جێگری سەرۆکی ئەنجومەنی ئاسایشی نیشتمانی ڕووسیا هۆشداری بە ئەمریکا دەدات و پێی دەڵێت“ڕووسیا، ئیسرائیل یان ئێران نییە و هەموو هەڕەشەیەک لە وڵاتەکەی هەنگاوێک بۆ جەنگ نزیکتان دەکاتەوە.”
ڕۆژی دووشەممە 28ی تەمموزی 2025 لیندزی گراهام، سیناتۆری ئەمریکا، لە تۆڕی کۆمەڵایەتی ئێکس پەیامێک بڵاودەکاتەوە و دەڵێت, “ ئەوانەی لە رووسیا پێیانوایە دۆناڵد ترەمپ، سەرۆکی ئەمریکا جدی نییە لە کۆتاییهێنان بە جەنگی ئۆکراینا، هەڵەن، و پێویستە رووسیا بە خێرایی بێتە سەر مێزی گفتوگۆ.”
لەبەرامبەردا دوێنێ سێشەممە 29ی تەمموزی 2025 دیمیتری مێدڤیدیڤ، جێگری سەرۆکی ئەنجوومەنی ئاسایشی نیشتمانی رووسیا، بە پۆستێک لە ئێکس وەڵامێکی توندبۆ سیناتۆرە ئەمریکییەکە دەنێرێت و دەڵێت،” بۆ تۆ و ترەمپ نییە فەرمان بکەن کەی بێینە سەر مێزی ئاشتی و گفتوگۆکان ئەو کاتە کۆتاییان دێت کە هەموو ئامانجەکانی ئۆپەراسیۆنە سەربازییەکەمان (لە ئۆکراینا) بەدەستهێنان. ”
دیمیتری مێدڤیدیڤ لە پۆستەکەیدا ئامۆژگاریی ترەمپیش دەکات و پێی دەڵێت: لەبری فەرمانکردن بە رووسیا، سەرقاڵی “سیاسەتی ئەمریکا بێت پێش هەموو شتێک.” لە بەشێکی تری پەیامەکەشیدا هۆشداریی بە سەرۆکی ئەمریکا دەدات، “رووسیا، ئیسرائیل یان ئێران نییە” و هەموو هەڕەشەیەک لە وڵاتەکەی، هەنگاوێک لە جەنگ نزیکتریان دەکاتەوە، نەک لەنێوان رووسیا و ئۆکراینا، بەڵکو لەگەڵ ئەمریکا.
ڕۆژی دووشەممە 28ی تەمموزی 2025 ترەمپ و کیەر ستامەر، سەرۆکوەزیرانی بەریتانیا لە سکۆتلاند کۆبوونەوە. لەکاتی قسەکردن بۆ ڕۆژنامەڤانان، سەرۆکی ئەمریکا رەخنەی لە پووتین گرت و گوتی، “سێ جار وا دەرکەوتووە کە نزیکین لە رێککەوتنی ئاگربەست، بەڵام لەناکاو مووشەکەکان ئاراستەی کیێڤ دەکرێن، ئەمە زۆرجار روویداوە و بەدڵم نییە.”
