هەنجیر هەرزان بوو و تەماتەش لە بازاڕەکاندا گرانتر بوو

لە بازاڕەکانی هەولێر و سلێمانی، نرخی هەنجیر بەهۆی زۆربوونی بەرهەمەوە بە شێوەیەکی بەرچاو دابەزیوە، بەڵام نرخی تەماتە بەهۆی کەمبوونەوەی بەرهەمی ناوخۆییەوە تا نزیکەی 3 هێندە بەرزبووەتەوە.

ئەمڕۆ دووشەممە، 31ی ئابی 2026، نرخی سەوزە و میوە لە بازاڕ و عەلوەکانی هەرێمی کوردستاندا گۆڕانکاریی بەرچاوی بەخۆیەوە بینیوە. لە هەولێر، نرخی تەماتەی بە کۆ لە 250 دینارەوە بەرزبووەتەوە بۆ 500 دینار، لە کاتێکدا نرخی تەماتەی ناوچە شاخاوییەکان، وەک سیدەکان و حاجی ئۆمەران، گەیشتووەتە 600 تا 750 دینار.

دانا عەزیز، ئەندامی ئەنجوومەنی عەلوەی هەولێر، هۆکاری ئەم بەرزبوونەوەیەی بۆ نزیکبوونەوەی وەرزی پاییز و کەمبوونەوەی بەرهەمی دەشتەکانی هەولێر گەڕاندەوە.

لە بەرامبەردا، نرخی هەنجیری ئاکرێ بەهۆی پێگەیشتنی بەرهەم و زۆربوونی خستنەڕووی لە بازاڕدا، لە 13,000 دینارەوە دابەزیوە بۆ 3,000 تا 4,000 دینار. هەنجیری تەقتەقیش بە کۆ بە نرخی 1,000 تا 1,500 دینار بۆ هەر کیلۆیەک مامەڵەی پێوە دەکرێت.

لە سلێمانی، حاجی عەتا محەممەد، گوتەبێژی عەلوەی سلێمانی، ڕایگەیاندووە کەمبوونەوەی بەرهەمی تەماتە لە هەولێر کاریگەریی ڕاستەوخۆی لەسەر بازاڕی سلێمانی داناوە. بە وتەی ئەو، نرخی تەماتەی بە کۆ گەیشتووەتە 750 دینار، چونکە بەرهەمی پێنجوێن لە ئێستادا ناتوانێت بەشی پێویستی بازاڕ دابین بکات.

نرخی هەنجیری ئاسایی لە سلێمانی 1,000 دینارە، بەڵام جۆرە بەناوبانگەکانی، وەک زەڵم، ئەحمەداوا و ئاکرێ، بەهۆی بەرزیی داواکارییەکانیان، هێشتا کیلۆکەیان بە 7,000 دینار دەفرۆشرێت.