لە گۆڕانکارییەکی گرنگدا لە دۆخی ناوخۆی سووریادا، ڕێبەری ڕۆحیی درووزەکانی سووریا، شێخ حیكمەت هیجری، ڕایگەیاندووە کە ڕۆڵەکانی سوەیدا داوای “سەربەخۆیی تەواو” لە حکومەتی کاتیی سووریا دەکەن و جەختیشی کردووەتەوە کە بە هیچ شێوەیەک دەستبەرداری مافی چارەی خۆنووسین نابن.
شێخ حیكمەت هیجری، ڕێبەری ڕۆحیی درووزەکانی سووریا، لە لێدوانێکیدا بۆ کەناڵی سکای نیوز عەرەبی بە توندی ڕەخنەی لە حکومەتی کاتیی سووریا گرت و بەوە تۆمەتباری کرد کە ئاستەنگ دروست دەکات لەبەردەم دانوستانەکان بۆ ئازادکردنی زیاتر لە 600 هاووڵاتیی سوەیدا کە ڕفێندراون، لەنێویاندا ژنیش هەن.
ئاماژەی بەوەشکرد، حکومەتی دیمەشق پابەند نەبووە بە چۆڵکردنی گوندە زیانلێكەوتووەکان و بەردەوامە لە چەواشەکردنی ڕاستییەکان. هەر بۆیە، هیجری داوایەکی ڕاستەوخۆی ئاراستەی کۆمەڵگەی نێودەوڵەتی کرد بۆ ئەوەی دان بەو “جینۆساید”ـەدا بنێت کە بەسەر خەڵکی سوەیدا هاتووە.
لەم لێدوانەدا، شێخ حیكمەت هیجری بە ڕوونی جەختی لەسەر داواکارییەکەی گەلی درووز کردۆتەوە و دەڵێت؛“داوای ‘سەربەخۆیی تەواو’ لە حکومەتی کاتیی سووریا دەکەین بۆ سوەیدا و دەستبەرداری مافی چارەی خۆنووسین نابین.”
ئەم وتانە نیشانەی قۆناغێکی نوێیە لە خەباتی سیاسیی درووزەکاندا لە سووریا و ڕەنگە کاریگەریی گەورەی لەسەر داهاتووی سیاسیی و جوگرافیای سووریا هەبێت.
