بە دوو گوژمە، لەلایەن نەتەوە یەکگرتووەکانەوە20 ملیۆن دۆلاری ئەمریکی لە سندوقی وەڵامدانەوەی فریاگوزارییەکان بۆ هاوکاریکردنی غەززە لە پڕکردنەوەی پێداویستییە بەپەلەکان تەرخان دەکرێت.
ئەمڕۆ سێشەممە 14ی ئۆکتۆبەری 2025 ڕێکخەری فریاگوزاریی نەتەوە یەکگرتووەکان، تۆم فیچەر ڕایگەیاند؛ ڕێکخراوی نەتەوە یەکگرتووەکان 11 ملیۆن دۆلاری دیکەی لە سندووقی وەڵامدانەوەی فریاگوزاریی بۆ هاوکارییە مرۆییەکانی غەززە تەرخانکرد.
ئەمەش لە کاتێکدایە، هەر هەفتەی ڕابردوو نەتەوە یەکگرتووەکان 9 ملیۆن دۆلاریان بۆ دابینکردنی سووتەمەنی بۆ کەرتی غەززە تەرخان کردبوو.
بەم شێوەیەش بڕی پارەی تەرخانکردووە بۆ غەززە دەگاتە 20 ملیۆن دۆلار.
بە گووتەی تۆم فلیچەر، ئەم پارەیە یارمەتیدەر دەبێت بۆ پڕکردنەوەی پێداویستییە بەپەلەکان، بەڵام هۆشداریدا لەوەی کە بەبێ هاوکاریی کردنی سندووقی وەڵامدانەوەی فریاگوزاریی، یارمەتییە پێویستەکان بەردەوام نابن بۆ ئەوانەی پێویستیانە.
ڕۆژی دووشەممە 2025-10-13، لووتکەی شەرم شێخ لە میسر بە ئامادەبوونی زیاتر لە 20 سەرکردەی وڵاتان بۆ ئاشتی غەززە بەڕێوەچوو، دواتر دۆناڵد ترەمپ، سەرۆکی ئەمەریکا لە لووتکەکەدا لە کاتی واژۆ کردنی ئاگربەستەکە گوتی: ئەمڕۆ ڕۆژێکی مەزنە بۆ ڕۆژهەڵاتی ناوەڕاست و سەرکردەی چەندان وڵات لێرە ئامادەن بۆ ئەوەی باس لە پرسی ئاشتی لە ڕۆژهەڵاتی ناوەڕاست بکەین، هەروەها لە کۆتاییدا دوای زیاتر لە سێ هەزار ساڵ، شەڕی غەززە کۆتایی هات؛ ئاماژەشی دا، ئاگربەستی غەززە زۆر گشتگیرە و باس لە هەموو یاسایەک دەکات.
