هەسەدە و دەسەڵاتی نوێی سووریا لە دانوستاند دان و پێشنیازکراوە مەزڵوم عەبدی، فەرماندەی گشتیی هەسەدە یان فەرماندەیەکی دیەکەی ئەو هێزە، پۆستی وەزیری بەرگری یان سەرۆک ئەرکانی سوپا وەربگرێت لە حکومەتی نوێی سووریا.
ئیلهام ئەحمەد، هاوسەرۆکی فەرمانگەی پەیوەندییەکانی دەرەوە لە ئیدارەی خۆسەری باکوور و ڕۆژهەڵاتی سووریا ڕایگەیاند، دیارترین ناکۆکییەکانی نێوان هەسەدە و حکومەتی نوێی دیمەشق بریتییە لە؛ داهاتووی پەیوەندییەکانی هەسەدە و سوپای سووریا و داهاتووی ئیدارەی خۆسەری و شێوەی حکومڕانی سووریا لەنێوان مەرکەزی و لامەرکەزی.
ئیلهام ئەحمەد ئەوەش ئاشکرا دەکات؛ لە ناو سووریا و لایەنەکانی دیکەش پێشنیاز کراوە مەزڵوم عەبدی یان فەرماندەیەکی هەسەدە پۆستی وەزیری بەرگریی سووریا یان سەرۆک ئەرکانی سوپای سووریا وەربگرێت، ئەوانەش پێشنیازن و ئەوان تاوتوێیان دەکەن بەڵام گەرەنتی دەستووری بۆ ماف و داواکارییەکانیان کاری لەپێشینەیان دەبێت بۆ قۆناغی داهاتوو.
ئەم بەرپرسەی ڕۆژئاوای کوردستان ئەوەش ڕادەگەیێنێت؛ ژمارەی هێزەکانی هەسەدە لەگەڵ هێزەکانی ئاسایشی ناوخۆ و یەپەژە نزیکەی 100 هەزار کەس دەبن.
زیاتر لە شەش مانگە هێزەکانی سووریای دیموکرات [هەسەدە] لەگەڵ دەسەڵاتی نوێی سووریا لە دانوستان و گفتوگۆدان بۆ تێکەڵکردنەوەی دامەزراوە سەربازی و مەدەنییەکانی ئەم دوو دەسەڵاتە، بەڵام تاوەکو ئێستا گفتوگۆکان بێ ئەنجام بوون.
