یونامی نیگەرانی خۆی دەربڕی دەربارەی سزادانی چوار ساڵ و نیو زیندانی بەسەر ڕۆژنامەنووس شێراوان شێروانی و داوا دەکات حکومەتی هەرێم سەروەری یاسا و مافەکانی مرۆڤ بپارێزێت.
ئەمڕۆ پێنجشەممە، 21ی ئابی 2025 نێردەی نەتەوە یەکگرتوەکان بۆ هاریکاریی عێراق (یونامی) لە بڵاوکراوەیەکدا نیگەرانی خۆی دەربڕی و ڕایگەیاند؛ “یونامی نیگەرانی خۆی دەردەبڕێت سەبارەت بە بڕیاری دادگەی بنەسڵاوە لە ڕۆژی 19ی ئابی 2025دا بە سزادانی رۆژنامەنووس بەڕێز شێروان شێروانی بە چوار ساڵ و نیو بەندکردن بە تۆمەتێک کە ئەو خۆی ڕەتی کردووەتەوە.”
یونامی باس لە نیگەرانییەکەی خۆی دەکات و دەڵێت، “ ئەم سزایەی شێروانی رەنگە لە جێگەی خۆیدا نەبووبێت و بەشێوەیەکی ستەمکارانەش درابێت”، هەروەها یونامی لەو باوەڕەدایە کە دادگای ناوبراو هۆکاری قەناعەت پێکەری بۆ ئەوەی کە پێی دەوترێت “زەرفی موشەددەد”ی بەهەند وەرنەگرتبێت.
نێردەی نەتەوە یەکگرتوەکان بۆ هاوکاریی عێراق جەخت لەوەش دەکاتەوە؛ ” سزادانەکە مایەی تانە لێدانە و یونامی کە هەر خۆشی لە کاتی دادبینییەکە لە 19ی ئابدا ئامادە بوو، لەسەر بەدواداچوونەکانی خۆی بۆ ئەم پرسە بەردەوام دەبێت.”
لە کۆتایی ڕاگەیاندراوەکەدا یونامی سەرنجی ئەوە دەدات، “کە حکومەتی هەرێمی کوردستان پێویستە سەروەریی یاسا و مافەكانی مرۆڤ بپارێزێت”، هەروەها “داواش لە دەسەڵاتدارانی هەرێمی کوردستان دەکات کە دڵنیابن لەوەی کە دادگاییکردنی تاوانباران بەشێوەیەکی ڕوون و ڕەوا و بەگوێرەی پێوەرە نێودەوڵەتییەکان بەرێوە بچێت.”
ڕۆژی 19ی ئابی 2025 ڕۆژنامەنووس و چالاکوانی دەڤەری بادینان [شێروان شێروانی] لە دادگەی بنەسڵاوە بە تۆمەتی هێرشکردنە سەر ئەفسەری سەربازی سزای چوار ساڵ و شەش مانگ زیندانی بەسەردا سەپێندراو و پاشان پارێزەرەکەی شێروان شێروانی تانەی لە بڕیارەکەدا و تۆمەتەکەی ڕەتکردەوە.
