بۆ مەبەستی خزمەتکردن و ئاشناکردنی گەنجان بە زمان و فەرهەنگی کوردی لە قەزای چۆمان پێشبڕکێی مانایی وشەی [کوردی بۆ کوردی] ساز دەکرێت، منداڵان و گەنجان دەتوانن بەشداری بکەن.
ناوەندی کەلتوریی چۆمان، کە ناوەندێکی ڕۆشنبیری ناحکومییە، ڕۆژی سێشەممە 19ی ئابی 2025 پێشبڕکێیەکی تایبەت بە زمانی کوردی ڕاگەیاند و ناوەندەکە دەڵێت، “لە هەنگاوێکی بێ وێنەدا بۆ خزمەتکردنی فەرهەنگ و زمانی کوردی، پێشبڕکێی مانایی بۆ 200 وشەی (کوردی بۆ کوردی) ساز دەکەین.”
دەربارەی ئامانجی پێشبڕکێکە ناوەندی کەلتوریی چۆمان ئەوەشی خستۆتەڕوو، “ ئامانج لەم پڕۆژە و پێشبڕکێیە، هاندانی نەوەی تازەیە بۆ ئەوەی مانای وشە کوردییەکان بزانن و فێریان ببن.”
تەمەنی بەشداربووان بۆ پێشبڕکێکە سنووردار کراوە و ناوەندەکە دەڵێت؛ لەم پێشبڕکێیەدا بەشداربووان تاقیکردنەوەیان پێ دەکرێت و تەمەن سنووردار کراوە، هەروەها پێویستە بەشداربوو تەمەنی لەنێوان [ 10 تاوەکو 21 ]ساڵدا بێت.
ناوەندی کەلتوریی چۆمان ماوەی حەوت ساڵە لە سەنتەری قەزای چۆمان دامەزراوە و ساڵانە چالاکی هونەری، رۆشنبیری، پەروەردەیی و فێرکاری لە بوارەکانی تەکنەلۆژیا پێشکەش بە خەڵکی دەڤەرەکە دەکات.
