حکومەتی هەرێم قەرزی درێژخایەن دەداتە 100 پڕۆژەی کشتوکاڵی

فەرمانگەی میدیا و زانیاریی حکومەتی هەرێمی کوردستان و وەزارەتی کار و کاروباری کۆمەڵایەتی، لە ڕۆژی 2ی ئابی 2026 دەستپێکردنی قۆناغی دووەمی پڕۆژەی ستراتیژیی ‘گەشانەوە’یان ڕاگەیاند، کە تێیدا قەرزی ئاسان بە بڕی 500 هەزار تا 150 ملیۆن دینار بۆ 100 پڕۆژەی کشتوکاڵی و پیشەسازی پێشکەش دەکرێت.

فەرمانگەی میدیا و زانیاریی حکومەتی هەرێمی کوردستان و وەزارەتی کار و کاروباری کۆمەڵایەتی، لە ڕۆژی یەکشەممە 2ی ئابی 2026، دەستپێکردنی قۆناغی دووەمی پڕۆژەی ستراتیژیی ‘گەشانەوە’یان بۆ پاڵپشتیکردنی پڕۆژە بچووک و مامناوەندەکان ڕاگەیاند. لەم قۆناغەدا قەرزی ئاسان کە بڕەکەی لە 500 هەزار تاوەکو 150 ملیۆن دینارە، پێشکەش بە 100 پڕۆژەی ناوخۆیی لە کەرتی پیشەسازی و کشتوکاڵدا دەکرێت بە ئامانجی بووژانەوەی ئابووری و ڕەخساندنی هەلی کار.

کوێستان موحەممەد، وەزیری کار و کاروباری کۆمەڵایەتیی هەرێمی کوردستان ئاشکرای کرد کە پڕۆژەی گەشانەوە بە هاوبەشی لە نێوان نووسینگەی سەرۆکی حکومەت و وەزارەتی کاردا بەڕێوەدەچێت. ئاماژەی بەوەش کرد کە قەبارەی پاڵپشتییە داراییەکان بەراورد بە پێشوو بەرفراوان کراون و ڕوونی کردەوە: “لە قۆناغی یەکەمدا پاڵپشتیی دارایی 25 پڕۆژەی بچووک و مامناوەندمان کرد، کە 24 پڕۆژەیان بە ڕێژەی 100٪ سەرکەوتوو بوون، بۆیە ئێستا بە متمانەیەکی زیاترەوە هەنگاو بەرەو قۆناغی دووەم دەنێین.”

ئامانجە سەرەکییەکانی قۆناغی دووەم:

پڕۆژەی گەشانەوە بە ئامانجی بووژانەوەی کەرتی کشتوکاڵ و پیشەسازی لە هەرێمی کوردستان، زیادکردنی بەرهەمی ناوخۆیی و بەرزکردنەوەی ئاستی گەشەپێدان و ڕەخساندنی هەلی کار بۆ گەنجان کار دەکات. مەرجێکی بنەڕەتی پڕۆژەکە ئەوەیە کە خاوەنکاران دەبێت لە بەرامبەر وەرگرتنی پاڵپشتییە داراییەکاندا ژمارەی کارمەندانی خۆیان زیاتر بکەن.

پڕۆژەی نیشتمانیی گەشانەوە، کە سەرەتا لە 25ی ئەیلوولی 2023 لەلایەن مەسرور بارزانی، سەرۆکی حکومەتی هەرێمی کوردستان و وەزارەتی کارەوە ڕاگەیەندرا، یەکێکە لە دەستپێشخەرییە ستراتیژییەکانی کابینەی نۆیەم بۆ هەمەجۆرکردنی سەرچاوەکانی داهات و کەمکردنەوەی پشتبەستن بە کەرتی گشتی لە ڕێگەی پاڵپشتیکردنی خاوەنکاران.