کچ و کوڕە پەرستارێکی نەخۆشخانەکانی کرماشانی ڕۆژهەڵاتی کوردستان کۆتاییان بە ژیانی خۆیان هێنا و دەگوترێت بەهۆی چارەسەرنەکردنی کێشەی پەرستارەکان بووە.
ڕۆژی شەممە 13ی کانوونی یەکەمی 2025 میلاد مروەتی تەمەن 25 ساڵ و پەرستار لە بەشی فریاکەوتنی نەخۆشخانەی ئیمامی کرماشان کۆتایی بە ژیانی خۆی هێنا.
ڕۆژی دواتر شەیدا ئەرزانی، پەرستار لە نەخۆشخانەی ئیمام رەزای کرماشان، کۆتایی بە ژیانی خۆی هێنا. کەناڵی هەواڵیی ماڵی پەرستارانی ئێران لەم بارەیەوە ڕایگەیاند: “شەیدا ئەرزانی پەرستارێکی ماندوونەناس و پابەند بووە بە کارەکەی و خزمەتی زۆری نەخۆشەکانی کردووە.”
میلاد پێش خۆکوشتنی لە پۆستێکی ئینستاگرام نووسیوویەتی؛ ویستم کۆتایی بە خەم بهێنم، بەڵام نەمتوانی. کۆتاییم بە خۆم هێنا”.
گەرچی تاوەکو ئێستا زانکۆی پزیشکیی کرماشان و دادپزیشکیی پارێزگاکە لەبارەی خۆکوشتنی ئەو دوو پەرستارە هیچیان ڕانەگەیاندووە، بەڵام سەعید مورادی وەفا، ئەندامی دەستەی بەڕێوەبەریی ماڵی پەرستاران لە پارێزگای کرماشان لە پەیجی خۆی لە تۆڕی کۆمەڵایەتیی ئینستاگرام لەبارەی هۆکاری خۆکوشتنی ئەو دوو پەرستارە نووسیویەتی؛ کاتێک کێشەکانی پەرستاران نابینرێن، ئیدی تێکدەشکێن و پەنا دەبەنە بەر ئەو کارە.
