لە پارێزگای ئامەدی باکووری کوردستان چوار کەس لەنێو بیرێکدا خنکان کە بۆ مەبەستی پاککردنەوە چوونەتە نێو بیرەکە.
ڕووداوەکە لە ڕۆژی سێشەممە 30ی ئەیلولی 2025 لە ناوچەی چەرمیکی سەر بە ئامەد ڕوویداوە. چوار کەس، کە سێیان برای یەکترین، بە مەبەستی پاککردنەوەی دەچنە نێو بیرەکە و گیان لەدەست دەدەن.
دوای ئەوەی کاتێکی زۆر دەنگیان نامێنێت و لە نێو بیرکە دەبن، کەسوکارەکەیان لایەنی پەیوەندیدار بۆ سۆراخیان ئاگادار دەکەنەوە.
تیمەکانی سەرۆکایەتیی بەڕێوەبردنی کارەسات و باری لەناکاوی تورکیا (ئافاد) بە سوود وەرگرتن لە پلیکانە و پەت، دەچنە نێو بیرەکە، بەڵام هەر چوار کەسەکە بەهۆی ژەهراوی بوون بە گاز گیانیان لەدەستداوە.
لەلایەکی دیکەوە پارێزگای ئامەد دەربارەی ڕووداوەکە ڕایگەیاند؛ ئەو تەرمانەی لە بیرەکە دەرهێندراون بە ناوەکانی، موحەممەد قەرەباخ [33 ساڵ]، مەمەت قەرەباخ [35 ساڵ]، کەمال قەرەباخ [18 ساڵ] و حەنیفی یەشیلیاپراک [38ساڵ]. ڕاستەوخۆ تەرمەکان بۆ پزیشکی دادی گوێزراونەتەوە.
ئەو بیرەکەی ئەم چوار کەسەی تیادا خنکاون، بیری ئاو بووە و پانیەکەی لە نێوان [1 بۆ 2.5] مەتر بووە و قوڵیەکەشی نزیکەی 15 مەتر بووە.
