نرخی تمەنی ئێرانی بۆ نزمترین ئاست دابەزی

بەهای تمەنی ئێرانی لە بازاڕەکانی ئێران و ڕۆژهەڵاتی کوردستاندا بۆ ئاستێکی نوێی نزم دابەزیوە، بە جۆرێک کە 100 دۆلار بە 20,250,000 تمەن مامەڵەی پێوە دەکرێت. لە هەمان کاتدا، بەهای دۆلار بەرامبەر دیناری عێراق لە بازاڕەکانی هەولێر و سلێمانی بەرزبووەتەوە و 100 دۆلار بە نزیکەی 154,400 دینار گەیشتووە.

بەپێی دوا زانیارییەکانی بازاڕ، بەهای تمەنی ئێرانی ئەمڕۆ دووشەممە بۆ نزمترین ئاستی پێوانەیی لە مێژووی خۆیدا دابەزیوە. نرخی 100 دۆلار لە بازاڕەکانی ئێران و ڕۆژهەڵاتی کوردستان گەیشتووەتە 20,250,000 تمەن.

ئەم نرخە بەراورد بە ڕۆژی پێشوو، نزیکەی 800,000 تمەن دابەزین نیشان دەدات. لە سلێمانی، نرخی نەختی 100 دۆلار بە 19,300,000 تمەن تۆمار کراوە.

لە هەمان کاتدا، بەهای دیناری عێراق بەرامبەر دۆلار دابەزیوە و نرخی دۆلار لە بازاڕەکانی هەولێر و سلێمانی بۆ نزیکەی 154,400 دینار بۆ هەر 100 دۆلار بەرزبووەتەوە.

بەپێی زانیارییەکانی بازاڕ، بڵاوبوونەوەی دەنگۆی سەبارەت بە لابردنی سفرەکانی سەر دراوی عێراقی، بووەتە هۆی زیادبوونی خواست بۆ کڕینی دۆلار و لە ئەنجامدا کاریگەری لەسەر دابەزینی بەهای دینار داناوە.

هەروەها، هەندێک لە شارەزایانی بواری ئاڵوگۆڕی دراو، هۆکاری بەردەوامبوونی دابەزینی تمەن بە بڕیاری سەپاندنی سزای نوێ لەلایەن ئەمریکاوە بەسەر ئێراندا دەبەستنەوە. ئەوان پێیان وایە فشارە سیاسی و ئابوورییەکان کاریگەریی ڕاستەوخۆیان لەسەر بازاڕی دراو و بەهای تمەن هەیە.