لە گوندێکی سنووری ئیدارەی سەربەخۆی سۆران، بەهۆی خواردنی قارچکەوە 11 کەس کە خزمی یەکترن ژەهراوی بوون.
ڕۆژی پێنجشەممە 23ی نیسانی 2026 د. حەمرین مینە، بەڕێوەبەری نەخۆشخانەی ئاشتی لە سۆران ڕایگەیاند: “11 کەس کە خزمی یەکترن لە گوندی بناوی سەر بە قەزای خەلیفان، بەهۆی خواردنی قارچکەوە ژەهراوی بوون و گەیەندرانە نەخۆشخانەی خەلیفان. دوای چارەسەرکردنێکی فریاگوزاری، ڕەوانەی بەشی فریاکەوتنی نەخۆشخانەی ئاشتی لە سۆران کران.”
د.حەمرین مینە گوتیشی: ” چوار لەو نەخۆشانە نیشانەی توندیان هەبوو وەک؛ سەرئێشە، ئازاری سک، ئارەقەکردنی زۆر و بەرزبوونەوەی پلەی گەرمای لەش.”
بەڕێوەبەری نەخۆشخانەی ئاشتی ئاماژەی بەوەش کرد، “دۆخی تەندروستیی نەخۆشەکان جێگیرە و مەترسییان لەسەر نییە و لە ژێر چاودێری و چارەسەری پزیشکیدان.”
ئەمساڵ ئەمە دووەمین حاڵەتە لەو سنوورە ڕوو دەدات، 4ی ئەم مانگەش، شەش کەسی یەک خێزان بەهۆی خواردنی قارچکەوە ژەهراوی بوون و باری تەندروستییان تێکچووبوو.
