حکومەتی هەرێمی کوردستان بەردەوامە لە جێبەجێکردنی پڕۆژە ستراتیژییەکان بۆ چارەسەرکردنی کێشەی کەمئاوی و دابینکردنی ئاوی پاکی خواردنەوە بۆ هاووڵاتییان. لەم چوارچێوەیەدا، پڕۆژەی گەورەی ئاوی ئاکرێ، کە بە گوژمەی 109 ملیار دینار جێبەجێ دەکرێت، لە قۆناغەکانی کۆتاییدایە و بڕیارە لە ماوەی 4 مانگی داهاتوودا تەواو بێت.
کۆتاییهێنان بە قەیرانی کەمئاوی لە ئاکرێ
ساڵانە لەگەڵ بەرزبوونەوەی پلەکانی گەرما لە وەرزی هاویندا، بەهۆی زیادبوونی بەکاربردنەوە کێشەی کەمئاوی لە ناوەندی قەزای ئاکرێ سەرهەڵدەدات. ئەم دۆخەش وای لە زۆرێک لە دانیشتووانی ناوچەکە کردووە بۆ دابینکردنی پێداویستییەکانیان پەنا ببەنە بەر کڕینی ئاو لە ڕێگەی تانکەرەکانەوە، کە بارگرانییەکی دارایی زۆری بۆ خێزانەکان دروستکردووە. پڕۆژەی ئاوی ئاکرێ ئامانج لێی گواستنەوەی ئاوی خواردنەوەیە لە ڕووباری زێی گەورەوە بۆ ناوەندی ئاکرێ و 18 گوندی دەوروبەری، بە توانای بەرهەمهێنانی 3 بۆ 4 هەزار مەتر سێجا ئاو لە کاتژمێرێکدا .
لە ئێستادا، ڕێژەی پێشکەوتنی کارەکان لە پڕۆژەی ئاوی ئاکرێ گەیشتووەتە 66% . کۆمپانیای جێبەجێکار ڕایگەیاندووە کە لە ماوەی 4 مانگی داهاتوودا تەواوی کارەکان ڕادەست دەکەن، بەمەش لە سەرەتای ساڵی نوێوە ئاوی پاکی خواردنەوە دەگاتە ناوەندی قەزاکە و دەوروبەری. ئەم پڕۆژەیە بە یەکجاری گرفتی کەمئاوی لە ناوچەکە بنبڕ دەکات و ژیانی دانیشتووان ئاسانتر دەکات.
پڕۆژە هاوشێوەکانی دیکەی حکومەت بۆ ئاسایشی ئاو
پڕۆژەی ئاوی ئاکرێ بەشێکە لە زنجیرەیەک پڕۆژەی ستراتیژیی گەورە کە حکومەتی هەرێمی کوردستان بۆ مسۆگەرکردنی ئاسایشی ئاو لە سەرانسەری هەرێم جێبەجێی دەکات. ئەم پڕۆژانە بە ئامانجی چارەسەرکردنی درێژخایەنی کێشەی کەمئاوی و دابینکردنی سەرچاوەی ئاوی بەردەوام بۆ دانیشتووان دێن. لەوانە:
- پڕۆژەی ئاوی ڕانیە – چوارقوڕنە – حاجیاوا: بە گوژمەی 36.7 ملیار دینار، 70%ی کارەکانی تەواو بووە و توانای دابینکردنی 72,000 مەتر سێجا ئاوی هەیە .
- پڕۆژەی ئاوی دەربەندیخان: کارەکانی ئەم پڕۆژەیە دەستیپێکردووەتەوە و 9 ملیۆن دۆلاری بۆ تەرخان کراوە .
- پڕۆژەی ئاوی فریاگوزاری هەولێر: بە گوژمەی 720 ملیار دینار و توانای بەرهەمهێنانی 480,000 مەتر سێجا ئاو ڕۆژانە، بۆ چارەسەرکردنی کێشەی ئاو لە هەولێر جێبەجێ کراوە .
