دوای ئەوەی چوار مانگ گەنجێکی دەڤەری برادۆست بێسەروشوێن دەبێت، براکەی چارەنووسی ئاشکرا دەکات و دەڵێت؛ براکەمان بە پێدانی ژنی رووسی و شووقە و مووچەیەکی باش هەڵخەڵەتێندراوە ئێستا لە بەرەکانی پێشەوەی جەنگی رووسیا بەرامبەر ئۆکراینا شەڕ دەکات.
سیامەند وەهاب، برای مەتین وەهاب، گەنجە بێسەروشوێنەکەی دەڤەری برادۆستە، ئەمڕۆ سێشەممە ڕایگەیاند؛ “ لە مانگی چواری ئەم ساڵ، مەتینی برام ڕووی لە شاری هەولێر کرد و لە شووشتنگەیەک ئیشی دەکرد، بەڵام دوای دوو مانگ گەڕایەوە.”
برای گەنجەکە، سیامەند وەهاب ئەوەشی ڕاگەیاند؛ مەتین مانگی حەوت بە پێمانی گوت کە دەچێت لە پردێ ئیش دەکات، بەڵام لەو کاتەی چووە بازگەی پردێ تاوەکو 15ی 8ی 2025 دەنگی نەما.
پاش ئەوەی بۆ ئەم ماوەیە مەتین هیچ دەنگێکی نامێنێت، بە گوتەی سیامەند وەهاب، کورتە ڤیدیۆیەک بۆ برایەکی دیکەی دەنێرێت و دەڵێت؛ “من لە شاری باخمووتی ڕۆژهەڵاتی ئۆکراینا شەڕ دەکەم.”
پاش ئەم کورتە ڤیدیۆیە، خێزانی ئەم گەنجە بێسەروشوێنە دەکەونە سۆراخکردنی زیاتر و گەنجێکی دیکەی کورد دەدۆزنەوە کە لە شارێکی دیکە بەرامبەر ئۆکراینا شەڕ دەکات؛ ئەویش گوتوویەتی: “خەڵکێکی زۆری عێراق لە کورد و عەرەبمان تێدایە.”
سیامەند وەهاب، باس لە چوونی براکەی بۆ بەرەکانی جەنگ و نێو سوپای رووسیا دەکات و دەڵێت؛ “چوونەکە بە ئازادیی خۆیەتی و بەزۆرەملێ نییە، بەڵام پێیانگوتووە ئیشێکی زۆر باشە و مووچەیەکی زۆرە، هاوکات شووقە و پاسپۆرت و ژنیشت مسۆگەرە. بۆیە براکەمان هەڵدەخەڵەتێ و دەچێت؛ بەڵام پێی ناڵێن دەتبەینە بەرەکانی جەنگ.”
لە ئێستادا ماڵباتی مەتین وەهاب داوا لە سەرۆکایەتیی هەرێمی کوردستان و ئەنجوومەنی وەزیران دەکەن، هەوڵێک بدرێت و سۆراخێکی براکەی بکرێت و “دەمانەوێ تەنیا ئەوە بزانین کە ئایا ماوە یان مردووە.”
