بۆ جارێکی دیکە یانەی ئامەدسپۆر، لەلایەن فیدراسیۆنی تۆپی پێی تورکیا سزادرا بەهۆی ئەوەی درووشمێکی کوردی بەکارهێناوە.
فیدراسیۆنی تۆپی پێی تورکیا بۆ جاری دووەم یانەی ئامەدسپۆری بە بڕی 110 هەزار لیرەی تورکی سزادا و هۆکاری سزادانەکەش بۆ نووسینی دروشمی، “یانەکەی ئێمە بۆ ئێوە” بە زمانی کوردی لەسەر درسێی یاریزانەکان دەگەڕێنێتەوە.
ئەمەش لە کاتێکدایە، هەفتەی ڕابردووش بە هەمان هۆکار بەبڕی 110 هەزار لیرەی تورکی سزادرا. فیدراسیۆنی تۆپی پێی تورکیا (TFF) سزادانی یانەی ئامەدسپۆر بە پاساوی “پێشێلکردنی رێنماییەکانی کەرەستەی وەرزشی” دەستنیشان دەکات.
لە بەرامبەر سزاکانی فیدراسیۆنەکە، کارگێڕی یانەی ئامەدسپۆر سکاڵا دژی ئەو دوو سزایە تۆماردەکات، چونکە درووشمە کوردییەکە بە ڕەزامەندیی فەرمیی فیدراسیۆنی تۆپی پێی تورکیا بەکارهێنرابوو.
ئامەدسپۆر یانەیەکی تۆپی پێی باکووری کوردستانە و یەکەم یانەی کوردییە لە مێژووی تۆپی پێی تورکیا، بتوانێت لە خولە پیشەگەرەکاندا لەسەر درێسەکەی درووشمی کوردیی هەڵگرتبێت. هەروەها زۆربەی یاریزانەکانی یانەکە کوردن.
