لەسەر ڕێگای گوندێکی باکووری کوردستان، هێرشی چەکداری دەکرێتە سەر خێزانێک و چوار ئەندامی خێزانەکە بەیەکەوە لەنێو ئۆتۆمبێلەکەیان کوژران.
ڕووداوەکە شەوی ڕابردوو 14ی ئەیلولی 2025 نزیک کاتژمێر 10:55 خولەک ڕوویداوە، کوژراوەکانیش دایک و باوکێک و دوو منداڵەکەیان بوون کە تەمەنیان 5 ساڵان و 9 ساڵان بووە. هاوکات شوێنی ڕووداوەکە، سەر رێگای گوندی نەواڵەی سەر بە ناحیەی قوبین بووە.
دەربارەی ڕووداوەکە پارێزگاری ئێلهـ ڕایگەیاند: چەند کەسێکی نەناسراو هێرشیان کردووەتە سەر ئەو خێزانە و دواتر بۆ شوێنێکی نادیار هەڵاتن، لە ئێستادا لێکۆڵینەوە لە ڕووداوەکە دەستیپێکردووە و بە فەرمانی دادوەر، چوار تۆمەتبار دەستگیرکراون.
تەرمی قوربانییان براونەتە پزیشکی داد و دواتر ڕادەستی کەسوکارەکانیان دەکرێنەوە و بڕیارە تەرمەکان لە گوندی ئەسکیهامور بە خاک بسپێردرێن.
میدیا تورکییەکان ئەوەش ئاشکرا دەکەن؛ دوژمنایەتی لە نێوان لایەنەکاندا بوونی هەبووە.
