بەمەبەستی بەکارهێنانی قوتابخانەکان لە عێراق، نۆ ڕۆژ پشوو دەبێت و بۆ هەرێمیش تا ئێستا بڕیاری لێ نەدراوە.
ئەمڕۆ سێشەممە 14ی ئۆکتۆبەری 2025 نەبەرد عومەر، بەرپرسی دەستەی هەڵبژاردنەکانی عێراق لە هەرێم ڕایگەیاند: سێ ملیۆن و 69 هەزار کەس مافی دەنگدانی هەیە و تا ئێستا 150 هەزار کارت دابەشکراوە بەسەر دەنگدەراندا.
نەبەرد عومەر ئەوەشی ڕاگەیاند: 35 هەزار کەس ناویان گەڕاوەتەوە بۆ کارمەندی سەر سندوقەکانی دەنگدان.
دەربارەی ڕۆژانی پشوو بۆ هەڵبژاردنی پەرلەمانی عێراق، بەرپرسی دەستەی هەڵبژاردنەکانی عێراق لە هەرێم دەڵێت، بە مەبەستی بەکارهێنانی قوتابخانەکان وەک بنکەی دەنگدان، لە عێراق لە 5 تاوەکو 13 مانگی 11 پشووی فەرمی دەبێت، بۆ هەرێمیش لەم چەند رۆژەدا بڕیاری لێدەدرێت.
بڕیارە 11ی 11ی 2025 هەڵبژاردنی داهتووی پەرلەمانی عێراق ئەنجام بدرێت و لە ئێستادا پارتە سیاسییەکان دەستیان بە بانگەشەی هەڵبژاردن کردووە.
