تیمێکی توێژینەوە لە ناوچەی ڕیۆ نیگرۆ لە پاتاگۆنیای ئەرجەنتین، هێلکەیەکی دایناسۆریان دۆزیوەتەوە کە بە شێوەیەکی تەواو پارێزراوە و تەمەنی بە نزیکەی 70 ملیۆن ساڵ مەزەندە دەکرێت.
تیمە توێژینەوەکە، کە ماوەیەکە لە ناوچە دەوڵەمەندەکەی ڕیۆ نیگرۆ خەریکی گەڕانن، چاویان بە هێلکەیەکی دایناسۆر کەوتووە کە قەبارەی لە هێلکەی وشترمرخ دەچێت و بە شێوەیەکی سەرسوڕهێنەر تەواو و پارێزراو ماوەتەوە. وادانراوە کە ئەم هێلکەیە هی دایناسۆرێکی گۆشتخۆری بچووک بێت لە جۆری “بۆناپارتینکوس” (Bonapartichnus)، کە لە کۆتاییەکانی سەردەمی کریتاسی ژیاوە.
ئەوەی دۆزینەوەکە گرنگتر دەکات ئەوەیە کە تیمی لێکۆڵینەوە پێیان وایە هێلکەکە پاشماوەی کۆرپەلەیەکی بەردبووی تێدایە. لە ئێستادا، زانایان خەریکی ئەنجامدانی پشکنینی وێنەگرتنی پێشکەوتوون (بەتایبەت CT scan) بۆ دڵنیابوونەوە لە بوونی ماددەی بایۆلۆجی لەناویدا. ئەگەر ئەمە پشتڕاست بکرێتەوە، ئەوا دەرگایەک بە ڕووی لێکۆڵینەوەی قووڵتر لەسەر پێکهاتە و پەرەسەندنی ئەم جۆرە دایناسۆرەدا دەکاتەوە.
گۆنزالۆ مونۆز، لە مۆزەخانەی زانستە سروشتییەکانی بێرناردۆ ڕیڤاداڤیا، بە ناشناڵ جیۆگرافیکی ڕاگەیاندووە: “دۆزینەوەی بەردبووی دایناسۆر شتێکی نامۆ نییە، بەڵام دۆزینەوەی هێلکەیەک لەم دۆخە تەواوەدا شتێکی بێهاوتایە.” مونۆز ڕوونیکردەوە، هێلکەی دایناسۆرە گۆشتخۆرەکان زۆر دەگمەنن چونکە توێکڵیان ناسکە و هاوشێوەی هێلکەی باڵندەکانی ئەمڕۆیە. ئەم خەسڵەتە وایکردووە کە بەدرێژایی ملیۆنان ساڵ زۆر ئەستەم بێت پارێزراو بمێننەوە، بە پێچەوانەی هێلکەی دایناسۆرە گیاخۆرەکان کە زۆرجار توێکڵیان ئەستوورتر بووە.
هێلکەکە دەگوازرێتەوە بۆ مۆزەخانەی زانستە سروشتییەکانی ئەرجەنتین بۆ ئەنجامدانی توێژینەوەی وردتر. چاوەڕوان دەکرێت ئەم دۆزینەوە دەگمەنە زانیاریی نوێ و گرنگ لەبارەی پەرەسەندنی دایناسۆرەکان و شێوازی هێلکەدانانیان ئاشکرا بکات، هەروەها تێڕوانینێکی باشترمان پێبدات دەربارەی ژینگەی ناوچەکە لە سەردەمی کریتاسیدا.
لە هەمان شوێندا، ددانەکانی شیردەرە کۆنەکان و کڕکڕاگەی دایناسۆر دۆزراونەتەوە، کە ئاماژەیە بۆ ئەوەی ناوچەکە شوێنێکی هێلانەکردنی دێرینی پێش مێژوو بووە. ئەمەش دەریدەخات کە پاتاگۆنیا بە گشتی ناوچەیەکی زۆر دەوڵەمەند بووە بە ژیانی جۆراوجۆر لە سەردەمی دایناسۆرەکاندا.
تیمی توێژینەوەکە لە گرتەیەکی ڤیدیۆییدا کە لە هەژماری خۆیان لە ئینستاگرام بڵاویان کردووەتەوە، نووسیویانە: “ڕەنگە ئەمە یەکەم دۆزینەوەی لەم جۆرە بێت لە ئەمەریکای باشوور. ئەم بەردبووە تەمەنی زیاتر لە 70 ملیۆن ساڵە و کۆمەڵێک هێلکەی تەواو لەگەڵیدا دۆزراونەتەوە.”
