بەهۆی ئاگرکەوتنەوە لە مۆڵی بازرگانی”گول پلازا” لە شاری بەندەری کەراچی لە باشووری پاکستان نزیکەی 50 کەس گیانیان لەدەستدا و ژمارەیەکی زۆریش بێسەروشوێنن.
ڕووداوەکە چۆن ڕوویدا؟
ڕۆژی شەممە 17ی کانوونی دووەمی 2026 خەڵکی مەبەستی کرینی جل و بەرگ سەردانی مۆڵی بازرگانی [گول پلازا] دەکەن، لە ناکاو ئاگرێک لە نهۆمی خوارەوەی مۆڵەکە دەکەوێتەوە. ئاگرەکە بۆ ماوەی دوو ڕۆژ بەردەوام بوو و زیانێکی زۆری بە مۆڵەکە گەیاندووەو زیاتر لە 1200 دوکانی جلوبەرگ و پێداویستی ناوماڵ بە تەواوی سووتاون.
بەرپرسانی شارەکە ڕایانگەیاند: ژمارەی ئەو کەسانەی گیانیان لە دەستداوە گەیشتووەتە 50 کەس. وە هۆشداری دەدەن ئەگەر هەیە ژمارەی ئەوانەی گیانیان لەدەستداوە زۆر لەو ڕێژەیە زیاتربێت، سەبارەت بە بریندارانیش بەرپرسان دەڵێن، تا ئێستا ئامارێکی فەرمیمان بە دەست نەگەیشتووە.
بەگشتی خەڵکی لە ناوخۆی پاکستان نیگەرانن بۆ ئەو ڕووداوەی ڕوویداوە و دەڵێن: ئێمە زۆر نیگەرانین لەو ڕووداوە و تیمەکانی ئاگرکوژێنەوە زۆر بە سستی و بێباکانە کاردەکەن. هۆکارێکی تریش کە نارەزایی خەڵکی لێکەوتووەتەوە ئەوەیە کە هيچ ڕێگایەکی دەرچوون لە مۆڵەکە بۆ خەڵک نەبووە تا بە ئاسانی بتوانن ڕزگاریان بێت.
حکومەتی پاکستان لەسەر ڕووداوەکە دەڵێت: تاوەکو ئێستا نازانین هۆکاری ئاگرکەوتنەوەکە چیە، بەڵام هەر کەسێک کەمتەرخەم بووبێت بەتوندی سزا دەدرێت و ڕووبەڕووی یاسا دەکرێتەوە.
