لە شاری کرماشانی ڕۆژهەڵاتی کوردستان، منداڵێکی سێ مانگە لە لایەن دایک و باوکییەوە بەهۆی هەژاری زۆر و نەتوانین لە دابین کردنی خەرجەکانی ژیان، بە نرخی 250 ملیۆن تومەن کە دەکات 2 هەزار 950 دۆلاری ئەمریکی بە بنەماڵەیەکی دیکە فرۆشتراوە.
ڕۆژی شەممە 18ی ئۆکتۆبەری 2025 ڕێکخراوی مافی مرۆڤی هەنگاو ڕاپۆرتێکی بڵاوکردۆتەوە و دەڵێت؛ لەم هەفتانەی پێشووتردا منداڵێکی سێ مانگە لە شاری کرماشان لەلایەن دایک و باوکییەوە فرۆشراوە و پێش فرۆشتن، ڕیکلامی فرۆشتنی منداڵەکە لە ماڵپەڕەکان و لەسەر دیوار بڵاوکراوەتەوە.
هەنگاو دەربارەی خێزانی کڕیار و فرۆشیار ڕایگەیاند؛ “بنەماڵەی فرۆشیار خەڵکی ناوچەکانی دەورووبەری شاباد بوونە و لە ئێستادا لە کرماشان نیشتەجێن، بە هۆی کێشەی زۆری ئابووری و کەم داهاتی لە سەرپەرشیاری، ناچار بوونە منداڵەکەی خۆیان بفرۆشن. بنەماڵەی کڕیاریش دانیشتووی کرماشانن و بە هۆی منداڵ نەبوون لە ساڵەکانی ژیانی هاوسەرگیرییاندا، هەوڵیان بۆ کڕینی ئەم منداڵە داوە.”
ڕێکخراوی هەنگاو ئەوەش ئاشکرا دەکات؛ منداڵەکە بە 250 ملیۆن تومەنی ئێرانی فرۆشراوە کە دەکاتە دوو هەزار و 950 دۆلاری ئەمریکی. بە وتەی سەرچاوەکانی هەنگاو، ئەم مامەڵەیە بە بێ چاوەدێری فەرمی ناوەندە دەوڵەتییەکان و پشتگیرییەکان جێبەجێ کراوە و هەتا ئێستا هیچ جۆرە کاردانەوەیەکی خێرا لە لایەن بەرپرسان ڕووی نەداوە.
دیاردەی فرۆشتنی منداڵ لە ئێران لە ماوەی ئەم ساڵانەی دواییدا، لە پێناو هەژاری، تۆماری ئابووریی و نەبوونی سیستەمی پشتگیری کاریگەر بۆ بنەماڵە لاوازەکان ڕووی لە زیاد بوون کردووە. ڕاپۆرتەکان لە شارە جیاوازەکان وەک مەشهەد، تاران و ئەهواز دەری دەخەن کە ئەم دیاردە ئیتر پەیوەندیی بە ناوچەیەکی تایبەتەوە نییە و بووەتە قەیرانێکی کۆمەڵایەتی
