بارانبارین بەردەوام دەبێت و ئەمجارە هەورەبروسکەی لەگەڵە

کەشناسی هەرێم، کەشی پێشبینیکراوی 48 کاتژمێری داهاتووی بڵاوکردەوە و ئاماژە بە هاتنی شەپۆلێکی نوێی بارانبارین بۆ سەر هەرێمی کوردستان دەکات.

ڕۆژی دووشەممە 2ی شوباتی 2026، کەشناسی و بوومەلەرزانی هەرێمی کوردستان ڕایگەیاند: ئەمڕۆ لە سنووری پارێزگای دهۆک و ناوچەکانی باکووری هەرێم نمەباران دەبارێت و لە ناوچە شاخاوییە سنووریەکانی باکووری هەرێم بەفر بارینێکی کەم دەبێت. پاشان لە درەنگانی شەودا کاریگەری دابارین زیاد دەکات و لە زۆربەی ناوچەکانی هەرێم نمەباران و بارانی مامناوەند دەبارێت.

دەربارەی سبەی سێشەممە، کەشناسی هەرێم ڕایگەیاند: ئاسمان هەوری باراناوی دەبێت و نمەباران و بارانی مامناوەند لە زۆربەی ناوچەکاندا دەبارێت، لەگەڵ بوونی هەورەبروسکە ڕێژەی دابارینەکە زیاتر لەسەر ناوچەکانی سنووری پارێزگای دهۆک و پارێزگای سلێمانی دەبێت.

هاوکات لە ناوچە شاخاوییە سنورییەکانی باکووری هەرێم بەفرێکی کەم دەبارێت و کاریگەری ئەم شەپۆلە تاوەکو درەنگانی شەو بەردەوام دەبێت لەگەڵ نزمبوونەوەی پلەکانی گەرما بەراورد بە ئەمڕۆ.

بەرزترین پلەکانی گەرمای پێشبینیکراو بە پلەی سیلیزی بۆ ڕۆژی سێشەممە:

هەولێر: 11 پلەی سیلیزی

پیرمام: 9 پلەی سیلیزی

سۆران: 5 پلەی سیلیزی 

حاجی ئۆمەران: 1 پلەی سیلیزی

سلێمانی: 10 پلەی سیلیزی

چەمچەماڵ: 11 پلەی سیلیزی 

هەڵەبجە: 11 پلەی سیلیزی

دهۆک: 10 پلەی سیلیزی

زاخۆ: 10 پلەی سیلیزی

ئاکرێ: 10 پلەی سیلیزی

لە لایەکی دیکەوە ئاراس جەبار، شارەزای کەشناسی دەڵێت: “مانگی یەک ساردترین مانگ بووە لە 18 ساڵی ڕابردوو.”