لە خۆپیشاندانەکانی تاراندا، ژنە کوردێکی شاری مهاباد بە گوللەی هێزە ئەمنییەکانی کۆماری ئیسلامیی ئێران کوژرا.
ئەمڕۆ چوارشەممە 14ی کانوونی دووەمی 2026 ڕێکخراوی مافی مرۆڤی هەنگاو لە ڕاپۆرتێکدا ڕایگەیاند؛ لە کاتی ناڕەزاییەکانی شاری تارانی پایتەختی ئێراندا، هێزە ئەمنییەکان تەقەیان لە خەڵکی ناڕازی کردووە و بەهۆیەوە ژنێکی کوردی خەڵکی مهاباد کوژراوە.
هەنگاو ئاشکرای دەکات، ژنە کوردەکە ناوی [گوڵالە مەحموودی ئازەرە] و دانیشتووی شاری تاران بووە. “رۆژی پێنجشەممە، 8ی کانوونی دووەمی 2026 لە خۆپێشاندانەکانی شاری تاراندا کوژراوە.”
ئەمەش لە کاتێکدایە ئاژانسی [هێرانا] کە ئاژانسێکی مافی مرۆڤی ئێرانە، ئاماری نوێ دەربارەی کوژراوانی خۆپیشاندانەکانی ئێران ئاشکرا دەکات و دەڵێت: تا ئێستا 2,403 پشتڕاستکراوەتەوە کە کوژراون، لەم ژمارەیەش 147 کەس هێزە ئەمنییەکان و کەسانی سەر بە دەسەڵاتن، کۆی ژمارەکەی دیکە هاووڵاتیی مەدەنین و 12 منداڵیشیان تێدایە.
