لە شاری مەریوانی ڕۆژهەڵاتی کوردستان، ئەندامێکی سوپای پاسداران ژنێک بەناوی لەیلا عەلیڕەمایی دەکوژێت، دوای ئەوی ملکەچ نابێت واز لە هاوسەرەکەی بهێنێت و هاوسەرگیری لەگەڵ ئەو کارمەندە بکات.
ڕۆژی دووشەممە 27ی ئۆکتۆبەری 2025 ڕێکخراوی مافی مرۆڤیی هەنگاو ڕاپۆرتێکی ژنکوژی بڵاوکردەوە و ڕایگەیاند؛ “ڕۆژی یەکشەممە 26ی ئۆکتۆبەری 2025 ژنێکی 40 ساڵە بە ناوی لەیلا عەلیڕەمایی خەڵکی گوندی بێساران و نیشتەجێی شاری مەریوان لە لایەن پیاوێکی دراوسێیان بە ناوی کەیوان باسامی، کە ئەندامی هێزە چەکدارەکانی سوپای پاسدارانە لەڕێگای بەکارهێنانی چەکی گەرمەوە کوژراوە.”
هەنگاو هۆکاری کوژرانی لەیلا ئاشکرا دەکات و دەڵێت؛ “سەرچاوەیەکی ئاگادار بە ههنگاوی ڕاگەیاند، بکوژەکە چووە بۆ ماڵی لەیلا و داوای لە ناوبراوە کردووە کە لە هاوژینەکەی جیاببێتەوە و لەگەڵ ئەو هاوسەرگیری بکات، بەڵام لەیلا ئەم داواکارییەی ڕەتکردۆتەوە. لە پاش ئەم ڕەتکردنەوەیە، بکوژەکە لەیلای لە پێش دووکانی شوێنی کارکردنەکەی، لەیلای داوەتە بەر دەستڕێژی گوللە و دەستبەجێ گیانی لەدەستداوە.”
ڕێکخراوی مافی مرۆڤیی هەنگاو، زانیاری لەسەر کەسی بکوژ بڵاودەکاتەوە و باس لەوە دەکات، بکوژ خاوەنی دوو هاوژینە و پێشووتر توندوتیژی بەرامبەر هاوژینەکانی بەکارهێناوە و هاوژینی دووەمی بەهۆی توندوتیژی بەردەوام داوای جیابوونەوەی کردووە.
لەیلا عەلیڕەمایی خاوەن هاوژین بووە و کچ و کوڕێکی منداڵی هەبووە، لەکاتی کوژرانی و ڕوودانی ئەم ڕووداوە هاوژینەکەی لە ماڵ نەبووە و منداڵەکانیشی لە قوتابخانە بوون.
