کەشناسی هەرێم ڕایگەیاند؛ ئەمڕۆ ئەگەرى هەورە تریشقە لەسەر ناوچە شاخاوییەکان هەیە و سبەیش هەورى تەواو لەگەڵ بارینى نمە باران دەبێت.
ئەمڕۆ سێشەممە 21ی ئۆکتۆبەری 2025 کەشناسی هەرێم پێشبینی خۆی بۆ کەشی ئەمڕۆ و سبەی بڵاوکردەوە و ڕایگەیاند؛ ئەمڕۆ سێشەممە، ئاسمان بەگشتى لە نێوان پەڵەهەور و نیمچە هەور دەبێت، کاریگەرى ئەو نزمە پاڵەپەستۆ لاوەزەى کە ڕووى لە ناوچەکە کردوە [سنوورى پارێزگاى دهۆک و ناوچە شاخاوییە سنوورییەکانى و بەشێک لە ئیدارەى زاخۆ] کاریگەرییەکەى درێژدەبێتەوە بۆ سەر بەشێک لە ناوچە سنووریەکانى پارێزگای هەولێر و شێوازى دابارین بە شێوەى نمە بارانى پچڕ پچر دەبێت، ئەگەرى هەورە تریشقە لە سەر ناوچە شاخاوییەکانى دهۆک هەیە.
کەشناسی هەرێم دەربارەی پلەکانی گەرما لە ئەمرۆدا دەڵێت؛ پلەکانی گەرما نزیک دەبێتەوە لە تۆمارکراوەکانی دوێنێ تەنها لە ناوچە شاخاوییەکان نەبێت کەمێک نزم دەبێتەوە.
دەربارەی سبەی ، کەشناسی هەرێم ڕایگەیاند؛ سبەینێ چوارشەممە، کەشناسی هەرێم ئاسمان پەڵەهەور و نیمچە هەور دەبێت، لە پارێزگای دهوک و ناوچە شاخاوییەکانى باکوور و باکوورى و باکوورى ڕۆژئاوا دەگۆڕێت بۆ هەورى تەواو لەگەڵ بارینى نمە باران لە سەر ئەو ناوچانە تا دوای نیوەڕۆ.
