لە ئەنجامی شەڕە چەقۆی دوو گەنج لە سنووری ئیدارەی گەرمیان گەنجێک کوژرا و یەکێکی دیکەش برینداربوو.
کەمێک لەمەوبەر پۆلیسی گەرمیان بڵاویکردەوە؛ “شەوی ڕابردوو، 31ی ئابی 2025 لەسەر ڕووباری سیروان شەڕەچەقۆ لەنێوان دوو گەنج ڕوویدا و لەئەنجامدا یەکێکیان گیانی لەدەستدا و ئەوەی دیکەش برینداربوو.”
دەربارەی گەنجە کوژراوەکە پۆلیسی گەرمیان ئەوەشی ڕاگەیاند؛“ ئەو کەسەی کوژراوە ناوی [ڕێکار عوسمان عەبدوڵا]یە و لەدایکبووی ساڵی 2007، هەروەها دانیشتووی قەزای کەلارە.”
دەربارەی بریندارەکەش پۆلیسی گەرمیان دەڵێت، “ لە ئێستادا بریندارەکە بەبڕیاری دادوەر و بەپێی مادەی 405 بەندکراوە”، هەروەها پۆلیسی بەشی نەهێشتنی تاوانی گەرمیان لەسەر ڕووداوەکە لێکۆڵینەوەیان دەست پێ کردووە.
بە پێی ڕاگەیاندراوەکانی بەڕێوەبەرایەتی پۆلیسی ئیدارەی گەرمیان، تەنها لە مانگی ڕابردوو [ئاب] دوو کەس بەهۆی دەمەقاڵێ و کێشەی کۆمەڵایەتیەوە لە سنووری ئیدارەی گەرمیان کوژراون و دوو کەسی دیکەش بریندارکراون.
