تەرمی پێشمەرگەیەک لە چیای گۆیژە لە نێو ئۆتۆمبێلەکەی خۆی بە کوژراوی دۆزرایەوە.
ئەمڕۆ چوارشەممە 15ی ئۆکتۆبەری 2025 میدیاکانی سنووری پارێزگای سلێمانی هەواڵی دۆزینەوەی تەرمی کەسێکیان بڵاوکردەوە کە پیشەی پێشمەرگەیە و تەرمەکەی لە نێو ئۆتۆمبێلی خۆی بە کوژراوی دۆزراوەتەوە.
بەگوێرەی زانیارییەکان؛ گوڵفرۆشێک تەرمی ئەو پێشمەرگەیەی لە چیای گۆیژە دۆزیووەتەوە. پێشمەرگەکە ناوی [لێزان لوقمان] و تەمەنی 30 ساڵە.
داڵ میدیا ئەوەشی زانیوە؛ ئەم پێشمەرگەیە خەڵکی پارێزگای هەڵەبجەیە و لە بەرگری فریاکەوتنی کانی گۆمە دەوامی کردووە.
گەرچی میدیاکان ئەو هەواڵەیان بە ڕووداوێکی خۆکوژی بڵاوکردەوە، بەڵام داڵ میدیا پابەندە ئیتیک و پڕەنسیپەکانی ڕاگەیاندن، ئەم جۆرە دەستەواژەیە بەکارناهێنین، چونکە تاوەکو ئێستا لایەنی ئەمنی و پەیوەندیداری شاری سلێمانی هیچ زانیارییەکیان بڵاونەکردۆتەوە.
