پارێزگاری هەولێر ڕایگەیاند؛ لە ناوەندی شاری هەولێر لەسەر ڕووبەری 200 دۆنم زەوی دەستکراوە بە دروستکردنی پێنج پارک بە مەبەستی زیادکردنی ڕێژەی سەوزایی.
ئومێد خۆشناو، پارێزگاری هەولێر ئەمڕۆ پێنجشەممە 6ی ئۆکتۆبەری 2025 ڕایگەیاند؛ لەپێناو زیادکردنی سەوزایی لە شاری هەولێر، پێنج پارک لەسەر ڕووبەری 200 دۆنم زەوی دروستدەکرێن و 40 هەزار درەختیان تیادا دەچێندرێت.
ئەو پارکانەی دروستدەکرێن لە ناوەندی شاری هەولێر دەبن بەو جۆرە:
یەکەمیان، لە نزیک شەقامی 120 مەتری، لەسەر رووبەری 80 دۆنم زەوی و نزیکەی 8 هەزار درەختی تیادا دەچێندرێت، ئێستا نزیکەی لە 70%ی کارەکانی تەواو بووە.
دووەم، پارکی ڕەشکین لەسەر رووبەری 47 دۆنم زەوی و 16 هەزار درەختی تیادا دەچێنرێت و ئێستا 50%ی کارەکانی تەواو بووە.
سێیەم، دروستکردنی پارکی گەڕەکی نازدار لەسەر رووبەری 4 دۆنم دروستدەکرێت؛ 6 هەزار درەختی تیادا دەچێنرێت و 80%ی کارەکانی تەواو بووە.
چوارەم، دروستکردنی پارکی گەڕەکی ژیان لەسەر ڕووبەری 7 دۆنم زەوی و 5 هەزار درەختی تیادا دەچێندرێت، کە ئەویش لە 70%ی کارەکانی تەواو بووە.
پێنجەم، پارکی یەکتربڕی شەقامی 150 مەتری کە ڕووبەرەکەی 60 دۆنمە و کارکردن تیایدا بەردەوامە.
ئەمەش لە کاتێکدایە، لە ئێستا دەستکراوە دروستکردنی پشتێنەی سەوزای هەولێر، کە لە دوای شەقامی 150 مەتری دێت و بەشێوەیەکی بازنەیی دەووری شاری هەولێر دەدات.
