دەزگایەکی تەندروستی بەریتانی ڕایدەگەیەنێت؛ چەندان سکاڵا دژی دەرمانی ڤیاگرا تۆمارکراون بەهۆکاری ئەوەی بەکارهێنەرانی ئەم جۆرە حەبە تووشی نابیستی، نابینایی، کێشەکانی هەڵوەرینی قژ و پێست بوونەتەوە و تەنانەت بەشێک لە بەکارهێنەران بەهۆیەوە چووکیان شکاوە.
دەزگای MHRA کە تایبەتە بە ڕێکخستنی دەرمان و بەرهەمەکانی چاودێریی تەندروستیی لە بەریتانیا ڕایگەیاند؛ لە 24 ساڵی ڕابردوو، لەنێوان ساڵانی 2000 تاوەکو 2024دا زیاتر لە 900 سکاڵا دژی دەرمانی دەنکۆڵەی ڤیاگرا تۆمار کراون، بەڵام پسپۆڕانی دەزگاکە بەشێک لە هۆکارەکان بۆ هەڵە بەکارهێنانی دەرمانەکە دەگەڕێننەوە.
ڕاپۆرتی دەزگا بەریتانییەکە، شەش پیاو بە نموونە دەهێنێتەوە کە بەهۆی زۆر بەکارهێنانی دەرمانی ڤایگرا تووشیی نابیستی و نابینایی بوون، هەروەها بەشێکی دیکە لە بەکارهێنەران کێشەی پێست و قژ هەڵوەرینیان بۆ درووست بووە.
لەلایەکی دیکەوە دەزگای MHRA ئاشکرای دەکات، چەند بەکارهێنەرێک دوای خواردنی ڤیاگرا ڕووبەڕووی شکانی چووک بوونەتەوە.
دەزگا بەریتانییەکە جەخت لەوەش دەکاتەوە، مەرج نییە ئەو کێشانە ڕاستەوخۆ و تەنها بەهۆی ئەم دەرمانەوەبن، بگرە پێشنیار بۆ بەکارهێنەران دەکات کە پێش بەکارهێنانی ڕاوێژ بە پزیشکی پسپۆڕ بکەن.
ڤیاگرا، دەرمانێکە تایبەت بۆ ئەو پیاوانە بەکاردەهێندرێت کە کێشەی لاوازی سێکسیان هەیە یان توانای سێکسیان نەماوە و بەتایبەت ئەو کەسانە دەگرێتەوە کە تەمەنیا هەڵکشاوە یان کێشەی تەندرووستیان هەیە، لێرە کۆمەڵێک زانیاریت پێ دەدەین بۆ بەکارهێنانی حەبی ڤیاگرا:
نابێت بۆ ئەوانەی دەرمانی پەستانی خوێن وەردەگرن، بەکاربێت.
نابێت ترێ و بەرهەمەکانی لەگەڵ ڤیاگرا بخورێن.
نابێت کحول بخورێتەوە.
نابێت ئۆتۆمبێل لێبخوڕدرێت.
باشترە بە گەدەی بەتاڵەوە بخورێت.
بوورانەوە، لێڵبوونی بینایی، هێڵنجدان و ئازاری سینگ کاریگەریی لاوەکیی ڤیاگران.
دەتواندرێت 30 خولەک تاوەکو 4 کاژێر پێش سێکس بخورێت.
