کتێبخانەی نووسەر و مامۆستای کۆچکردوو د.عەزیز گەردی بە 136 ملیۆن دینار فرۆشراوە و براکەشی دەڵێت؛ بەبێ ڕەزامەندی خۆیان ئەم کارە کراوە. نووسەرێکیش ئەمە بە کفری ڕۆشنبیری ناوزەند دەکات.
ڕۆژی دووشەممە، 18ی ئابی 2025 ئەسکەندەر زرار، شاعیر و نووسەر و بەڕێوەبەری سەنتەری رۆشنبیریی خەون لە تۆڕی کۆمەڵایەتی فەیسبووک پۆستێکی کردووە و رایگەیاند؛ “ دوای ئەوەی ماوەیەک پێش ئێستا خانووەکەی لە زیادکردنێکی ئاشکرادا [مەزاد] فرۆشرا. دوێنێ کتێبخانەی نووسەر و مامۆستای کۆچکردوو د.عەزیز گەردی کە پێکهاتبوو لە 18هەزار و 514 کتێب لەگەڵ هەزار و 938 گۆڤار و ئەتڵەسی گەورەی شوێنەوار، لە زیادکردنێکی ئاشکرادا بە بڕی 136 ملیۆن دینار بە بڕیاری دادگە فرۆشرا.”
ئەسکەندەر زرار ئەوەشی ئاشکرا کرد، کتێبخانەکە لەلایەن برازای عەزیز گەردی بە ناوی ] هێژا بەکر[ کڕاوەتەوە.
تەها گەردی برای دکتۆرد عەزیز گەردی ڕایگەیاند،” راستە کتێبخانەکە فرۆشراوە دوای ئەوەی دادوەر بڕیاری لەسەردا، بەڵام لە سەرەتاوە تاوەکو ئەمڕۆش من لەگەڵ فرۆشتنیدا نەبووم.”
لەلایەکی دیکەوە، نووسەر و شاعیر، توانا ئەمین داواکارییەک ئاڕاستەی سەرۆکی حکومەتی هەرێمی کوردستان دەکات و دەڵێت، “ بەڕێز کاک مەسرور بارزانی، تاوانێکی گەورە و کفرێکی ڕۆشنبیرییە کتێبخانەی دانسقە و پڕبەرهەمی پڕبەرهەمترین وەرگێڕی کورد مامۆستا [عەزیز گەردی]، بفرۆشرێ و خەڵک بیکڕێت.”
توانا ئەمین ئەوەش دەخاتە ڕوو کە؛ ئەمە سەرمایەی ئەدەبیی ئێمەیە، دەبێ وەزارەتی ڕۆشنبیری یان ئەکادیمیای کوردی بیکڕێت و بەڕووی خەڵکدا بیکاتەوە و لە موڵکی تایبەتییەوە ببێت بە موڵکی گشتی.
عەزیز ئەحمەد عەبدوڵڵا، ناسراو بە عەزیز گەردی نووسەر و وەرگێڕی کورد لە ساڵی 1947 لە بەحرکەی هەولێر لەدایکبووە. گەردی دەرچووی بەشی زمانی فەرەنسی بوو لە زانکۆی بەغدا، دواتر لە ساڵانی 1994 و 1999 بڕوانامەکانی ماستەر و دکتۆرای بەدەستهێنا و زۆر شاکاری جیهانی بۆ سەر زمانی کوردیی ناوەندی وەرگێڕاوە. بۆ دواجار لە ڕێکەوتی 2022-07-06لە شاری هەولێر کۆچی دوایی کرد.
