ئێوارەی ئەمڕۆ، ئەنجومەنی وەزیرانی عێراق بڕیاری لەسەر خەرجکردنی مووچەی مانگی شەشی فەرمانبەرانی هەرێم دا و بڕیارە سبەیش وەزارەتی دارایی هەرێم داهاتی نانەوتی بۆ خەرجکردنی مووچە بۆ بەغدا بنێرێت.
ئەمڕۆ سێشەممە 26ی ئابی 2025 لە کۆبوونەوەی ئەنجومەنی وەزیرانی عێراق بە سەرپەرشتی موحەممەد شیاع سودانی، بڕیار لە خەرجکردنی مووچەی مانگی 6ی فەرمانبەرانی هەرێم درا بەو مەرجەی، “هەرێم پابەند بێت بە ناردنی 120 ملیار دینار لە داهاتی نانەوتی هەرێمی کوردستان.”
دوای ئەم بڕیارەی ئەنجومەنی وەزیرانی عێراق، سەرچاوەیەک لە وەزارەتی داریی و ئابووری هەرێمی کوردستان ڕایگەیاند، “سبەی دەست بە رێکارەکانی ناردنی 120 ملیار دینارەکە دەکەین. رێکارەکان بریتییە لە کۆکردنەوەی پارەکە و دواتر گواستنەوەیەتی بۆ سەر هەژماری وەزارەتی دارایی عێراق.”
پێشبینییەکان بە جۆرەن، ئەگەر سبەی وەزارەتی دارایی هەرێم بڕی 120 ملیار دینار وەکو داهاتی نانەوتی ڕادەستی بەغدا بکات، وەزارەتی دارایی عێراقیش لە کۆتایی ئەم هەفتەیە یان سەرەتایی هەفتەی داهاتوو مووچەی مانگی 6ی فەرمانبەرانی هەرێم خەرج دەکات.
دواین جار لە ڕێکەوتی 2025-07-24 مووچەی مانگی ئایاری ساڵی 2025 لەلایەن بەغداوە خرایە سەر هەژماری وەزارەتی دارایی هەرێمی کوردستان.
