بڕیارە لە نزیکترین کات شاندی دەم پارتی بۆ ئیمڕاڵی لەگەڵ عەبدوڵا ئۆجەلان کۆببێتەوە و چاوەڕوان دەکرێت، ئۆجەلان پەیامەکانی دەربارەی چەکدانانی پەکەکە بۆ ڕای گشتی بڵاوبکاتەوە.
ڕۆژنامەیەکەی نزیک لە دەم پارتی لە باکووری کوردستان ڕایگەیاند، ئەم هەفتەیە شاندی دەم پارتی بۆ ئیمراڵی بڕیارە سەردانی زیندانی دورگەی ئیمڕاڵی بکەن و لەگەڵ ڕێبەری پەکەکە عەبدوڵا ئۆجەلان کۆببنەوە. شاندەکە پێکهاتووە لە پەروین بوڵدان، جێگری سەرۆکی پەرلەمانی تورکیا و میتحەت سانجار، پەرلەمانتاری دەم پارتی.
ئەم سەردانە بە یەکەم کۆبوونەوەی شاندکە دادەندرێت دوای دامەزراندنی کۆمسیۆنی هاودەنگی نیشتیمانی، برایەتی و دیموکراسی.
هەروەها ڕۆژنامەکە ئەوەش خستۆتەڕوو کە چاوەڕوان دەکرێت ئۆجەلان پەیامەکانی دەربارەی دامەزراندنی کۆمسیۆن و پڕۆسەی چەک دانانی پەکەکە بە شاندەکە ڕابگەیێنن و پاشان ئەوانیش بۆ رای گشتی بڵاوبکەنەوە.
کۆتا جار لە ڕێکەوتی 2025-07-25 شاندی دەم پارتی بۆ ئیمڕاڵی لەگەڵ عەبدوڵا ئۆجەلان ڕێبەری پەکەکە کۆبوونەوە و ڕۆژی پاشتر نووسراوێکیان دەربارەی دەرئەنجامی کۆبوونەوەکەیان بڵاوکردەوە.
