سالم جاسم
هەرکاتێک لێرە و لەوێ هەڵە کرا و هەرێم و پێگەکەی کەوتنە ژێر مەترسییەوە، کە بارودۆخ لەدەست دەرچوو، کاتێک لای هەمووان ئەگەرەکان لەژێر سفردا بوون، سەرۆکی ھەرێمی کوردستان، دەرچەیەک دەدۆزێتەوە بێ ئەوەی بە خەیاڵی ئەوانی دیکەدا بێت.
لەکاتێکدا لوولەی تفەنگەکان هێشتان سارد نەبوونەتەوە و لە میدیاکانیشەوە دەستەویەخە شت لەسەر یەکتر دەنووسن، حەتمەن ئەو بارودۆخە جوولەیەکی دیپلۆماسی لە سەرۆک نێچیرڤان بارزانی دەخوازێت، بۆئەوەی هەمووان، میدیا و تفەنگەکانیان لە شان بھێنێتە خوارەوە.
لە کۆنفرانسی جینۆسایدی ئیزدییەکان، نێچیرڤان بارزانی و جەعفەر شێخ مستەفای جێگری پێکەوە دەرکەوتن، بەڵێ ئەوە پەیامە، بۆ ئەوانەی خولیای پەرتەوازەیی و پچڕانی بەستەری کوردبوونمان دەکەن، بێ ئەوەی هیچ بڵێ، تێیگەیاندن کەوا دەبێت ئێمەمانان کە لە بەرپرسیاریەتیداین، دەبێت بەرژەوەندیی هەرێم و خەڵکەکەی لەسەرووی خۆمان و حزبەکانمان ببینین.
جارێکی دیکەش بەبیر هەمووانی هێنایەوە کەوا هێشتا برین و ئازاری گەلێک زۆر سەختە و بەسەر جەستەی ئەم هەرێمەوە وەک نیشانە دیارن، هێشتان ئەو ئازارانە کۆتایی نەهاتوون، تا ئێمە لەنێو خۆمان دەست بۆ یەکدی ببەین و برینی زیاتر بخەینە سەر هەرێمەکەمان.
بۆیە جوولەی ئەمڕۆی سەرۆک نێچیرڤان بارزانی ئارامکردنەوەی ڕای گشتیی و، بەبەرکردنەوەی ھێزی ھەرێم بوو، کە سەقامگیری و ئاشتی دەبێ دەنگی بەھێز بێت و ھەر ڕووداوێکیش ڕوویداوە دەبێ یاسا سەروەر بێت.
