ئەمڕۆ هەرێم و بەغدا لەسەر داهاتی نانەوتی ڕێککەوتن و مەلەفی نەوتیش بەتەواوەتی ڕادەستی بەغدا کراوە. لەم یەک دوو ڕۆژە 120 ملیار دینار داهاتی نانەوتی ڕادەستی بەغدا دەکرێت.
ڕۆژی یەکشەممە 17ی ئابی 2025 شاخەوان عەبدوڵا، جێگری سەرۆک پەرلەمانی عێراق بە میدیاکانی ڕاگەیاند، “ حکومەتی عێراق خۆی ڕایگەیاندووە کە مەلەفی نەوتی هەرێمی کوردستان بە تەواوەتی ڕادەستی سۆمۆ کراوە و سۆمۆ بە هەماهەنگی لەگەڵ حکومەتی هەرێم کار دەکات بۆ دووبارە هەناردەکردنەوەی نەوت.”
شاخەوان عەبدوڵا دەربارەی ڕەزامەندی تورکیا بۆ هەناردەکردنەوەی نەوتی هەرێم ئەوەشی ڕاگەیاند، “ حکومەتی عێراق بەهۆی سکاڵاکانی لەسەر تورکیا پێویستە دووبارە ڕێککەوتنێکی نوێ بە مەرجی نوێ بۆ هەناردەکردنەوەی نەوتی هەرێم ئەنجام بدەن.”
لەلایەکی دیکەوە داڵ میدیا زانیویەتی،120 ملیار دینار داهاتی نانەوتی لەلایەن هەرێمی کوردستانەوە ئاماددەکراوە و کەمێک لەمەوبەر هەردوولا، حکومەتی هەرێم و بەغدا لەسەر داهاتی نانەوتی ڕێککەوتوون.
بەگوێرەی زانیاریەکانی داڵ میدیا، ئەمڕۆ یان سبەی ئەو بڕە داهاتە ڕادەستی بەغدا دەکرێت، دوێنێش شاخەوان عەبدوڵا ئەوەی ڕاگەیاند، “مەلەفی هەناردەکردنەوەی نەوت لە دەستی هەرێم نەماوە و بەتەواوەتی ڕادەستی بەغدا کراوە.”سبەی سێشەممە کۆبوونەوەی ئەنجومەنی وەزیرانی هەرێمی کوردستان بەڕێوەدەچێت و دوای کۆبوونەوەکە، بڕیار وایە شاندێکی هەرێم بۆ پرسی ناردنی مووچە و هەماهەنگی هەناردەکردنەوەی نەوت سەردانی بەغدا بکەن، پێشبینییەکان ئەوە دەردەخەن ئەگەر هەیە لە هەفتەی داهاتوو بڕیار لەسەر ناردنی مووچەی مانگی حوزەیران بدرێت.
