د. یاد نەقشبەندی لە کۆنگرەیەکی ڕۆژنامەوانی دۆخی نەخۆشخانەی هیوا تایەبەت بە شێرپەنجە دەخاتە ڕوو و دەڵێت؛ لە ئێستادا داهاتی گومرگی خواردنەوە کحولییەکان و جگەرە ناگەڕێتەوە بۆ سندوقی شێرپەنجە.
ئەمڕۆ سێشەممە 5ی ئابی 2025 ، د. یاد نەقشبەندی، بەڕێوەبەری نەخۆشخانەی هیوا لە کۆنگرەیەکی ڕۆژنامەوانی ڕایگەیاند؛ “ داهاتی سندوقی شێرپەنجە لە %60 کەمیکردووە و لە مەترسی دایە، چونکە خەرجیمان زۆر زیاترە لەو داهاتەی کە دێتە سندوقەوە”.
دەربارەی داهاتی ئێستای سندوقی شێرپەنجە، بەڕێوەبەری نەخۆشخانەی هیوا ئەوەشی ڕاگەیاند؛ “ پشکی شێری داهاتی سندوقی شێرپەنجە لەئێستادا لەسەر داهاتی بەڕێوەبەرایەتیی گشتیی هاتووچۆی سلێمانییە، داواش لە حکومەتی عێراق دەکەین زیاتر هاوکاری نەخۆشخانەکەمان بکات.”
دکتۆر یاد جەختی لەوە کردەوە، ئەو خزمەتگوزاری و چارەسەرانەی لە نەخۆشخانەکەمان پێشکەش بە توشبووانی شێرپەنجە دەکرێت، لە هیچ سەنتەرێکی شێرپەنجە لە تەواوی عێراق ناکرێت.
بەڕێوەبەری نەخۆشخانەکە باس لەوەش دەکات، “تێچووی مانگانەی چارەسەری هەندێک نەخۆشی شێرپەنجە نۆ ملیۆن دینارە، دەبێت کاربکەین بۆ زیاکردنی داهاتی سندوقی شێرپەنجە و بەرپرس نین لەو رێکخراوانەی بە ناوی نەخۆشانی شێرپەنجەوە پارە کۆدەکەنەوە.”
نەخۆشخانەی هیوا، نەخۆشخانەیەکی 180 قەڵەوێرەییە و تایبەتە بە چارەسەرکردنی شێرپەنجە و نەخۆشییەکانی خوێن. هیوا بە پلەی یەکەم دێت لەسەر ئاستی عێراق لەڕووی زانستییەوە چارەسەر پێشکەش بە هەموو تەمەنەکان دەکات.
