حیزبی بزووتنەوەی پەیوەندی ئیسلامی کوردستان بەهۆی بێ پارەی نەیانتوانیووە بەشداری هەڵبژاردنی داهاتووی پەرلەمانی عێراق بکەن و دەڵێن؛ “خەرجیمان لەسەر شانی ئەندامانمانە.”
ڕۆژی شەممە 9ی ئابی 2025، كامیل حاجی عەلی، سەرۆکی بزووتنەوەی پەیوەندی ئیسلامی کوردستان ڕایگەیاند؛ “دۆخی دارایی هاوڵاتیانی هەرێم تا دێت خراپتر دەبێت و كێشمەكێشەكانی نێوان هەرێم و بەغداش ئاسۆیەكی ڕوونی تیا نییە بۆ بنبڕكردنی كێشەكان و چارەسەری دۆخی دارایی فەرمانبەران و مووچەخۆرانی هەرێم.”
کامیل حاجی لە بەشێکی دیکەی ڕاگەیاندراوەکەدا دەڵێت،” ئێمەش بەشێكین لە هاوڵاتیانی هەرێم و داهات و خەرجیمان لەسەر شانی ئەندامانمانە، هەر بۆیە نەمانتوانیوە ئەو بڕە پارە جیاوازانەی بۆ كۆمسیۆن پێویستە دواتر بۆ بەڕێوەچوونی بانگەشەی هەڵبژاردنەكان دابینی بكەین، هەر بۆیە نەمانتوانی بەشداری هەڵبژاردنەكان بكەین”.
بزووتنەوەی پەیوەندی ئیسلامی بە سەرۆكایەتی كامیل حاجی عەلی، لە كۆتایی ساڵی 2023 لە بزووتنەوەی ئیسلامی كوردستان بە سەرۆكایەتی عیرفان عەلی عەبدولعەزیز، جیابوونەوە و دواتر ئەم حیزبە نوێیان راگەیاند.
